Në 24 orët e fundit, shërbimet e policisë kanë proceduar penalisht tre persona si dhe kanë ndëshkuar 29 drejtues mjetesh, 262 shtetas dhe 6 njësi tregëtie në zbatim të masave kufizuese për vënien në kontroll të pasojave që sjellin përhapjen e COVID-19.
Burime zyrtare bëjnë me dije se 29 drejtues mjetesh janë ndëshkuar me heqje të lejes së drejtimit dhe bllokim mjeti, pasi kanë shkelur urdhrin e ndalim qarkullimit. Ndërsa 262 shtetas, janë konstatuar duke lëvizur në këmbë apo me biçikleta, pa ndonjë arsye apo emergjencë dhe janë gjobitur me 10.000 lekë.
Gjithashtu janë proceduar penalisht dhe 3 shtetas, 1 në Tiranë, për mosbindje ndaj urdhrit të punonjësit të Policisë; 1 në Korçë dhe 1 Gjirokastër, për drejtim mjeti në mënyrë të parregullt.
Në të gjithë vendin janë konstatuar 6 njësi tregtie që nuk kanë zbatuar orarin e mbylljes dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Policia e Shtetit apelon për të gjithë qytetarët që të respektojnë masat kufizuese, për të bërë të mundur parandalimin e përhapjes së COVID-19.
