Me mijëra persona janë vendosur në karantinë në Indi, si masa për të luftuar pandeminë e koronavirusit.
Por disa nga elementët që mundësojnë zbatimin e këtyre masave, si tabelat e vendosura jashtë shtëpive dhe publikimi i të dhënave personale të banorëve, ka sjellë pasoja për ata, shkruan BBC.
Familja me 6 anëtarë e Bharat Dhingra është vendosur në karantinë në Delhi, kryeqytetin e Indisë, pasi vëllai dhe kunata e tij u kthyen nga Shtetet e Bashkuara më 22 mars. Ata nuk kanë asnjë simptomë, por e gjithë familja ndoqi këshillat e qeverisë dhe u vendosën të gjithë në karantinë.
Autoritetet lokale vendosën një tabelë jashtë shtëpisë, ku banorëve u kërkohej të mos e vizitonin shtëpinë, pasi ndodhej në karantinë. Kjo gjë është bërë që rregullat të respektohen nga të gjithë, por për familjet në karantinë është kthyer në një stres dhe presion psikologjik.
“Shtëpia jonë është kthyer si një kopsht zoologji”, ka thënë Bharat. “Njerëzit ndalojnë jashtë shtëpisë dhe bëjnë foto aty. Fqinjët tanë na thonë të futemi brenda edhe kur ne dalim në ballkon për vetëm një minutë”.
Ai thekson se kjo është një shkelje e privatësisë së familjes së tij. “Njerëzit duhet të kuptojnë se karantina është një masë paraprake dhe nuk do të thotë se ne jemi të infektuar, por edhe nëse do të ishim, kjo nuk do të thotë që ne duhet të izolohemi”, thotë ai.
Disa personave që duhet të qëndrojnë në karantinë u janë vendosur edhe vula në duar, por autoritetet thonë se sërish ka nga ata që e thyejnë karantinën.
