Mijëra prostituta të huaja që punojnë në Gjermani kanë mbetur pa shtëpi pasi bordellot u mbyllën për shkak të shpërthimit të koronavirusit dhe mbylljes së kufijve, duke e bërë të vështirë për to të kthehen në vendlindje.
Autoritetet në këtë shtet, ku prostitucioni është i ligjshëm për gati dy dekada, mbyllën muajin e kaluar jo vetëm shtëpitë publike por edhe bizneset e tjera si restorantet dhe klubet e natës për të ngadalësuar përhapjen e virusit.
“Koronavirusi ka qenë një fatkeqësi për mua”, thotë një prostitutë polake në qytetin perëndimor të Bochum të njohur për klientët e saj si Nicole.
“Nuk kam pasur të ardhura që nga mesi i Marsit dhe nuk kam një vend për të fjetur”, shtoi ajo, duke mos pranuar të jepte emrin e saj të vërtetë.
Para bllokimit, Nicole i paguante bordellos së saj 90 Euro në ditë për një dhomë për të takuar klientët dhe të jetonte aty. Punonjësit e seksit në Gjermani klasifikohen si të vetëpunësuar, paguajnë taksa dhe në teori kanë të drejtë në ndihmë financiare nga një fond i krijuar nga qeveria për të ndihmuar profesionistët e pavarur për shkak të pandemisë.
“Unë shpresoj se qeveria do të pranojë deklaratat e mia që kam paguar taksat në mënyrë që të mund të përfitoj nga papunësia. Nëse kjo ndodh, unë do të jem në gjendje të transferohem në një apartament”, shtoi Nicole.
Kërkesa për seks të paguar është ende në rritje, megjithë rrezikun e përhapjes së koronavirusit ndaj disa gra po e marrin këtë rrezik. Nga 200,000 prostituta aktive në Gjermani, rreth 80 përqind janë të huaja, kryesisht nga Bullgaria, Rumania, Polonia dhe Ukraina, tashmë të pastreha. Tani ato po qëndrojnë me miqtë ose jetojnë në rrugë.
Bullgaria, Rumania dhe Polonia kërkojnë që qytetarët të kthehen në karantinë për 14 ditë, një masë e krijuar për të ngadalësuar përhapjen e virusit, i cili në Gjermani ka infektuar gati 80,000 dhe vrarë më shumë se 1000 qytetarë.
