Në maternitetin “Koço Gliozheni”, mjekët e klinikës së Obstetrikës kanë denoncuar në media një konflikt mes tyre dhe drejtuesve së këtij instiucionit. Bluzat e bardha thonë se situata e krijuar po cenon shërbimin në këtë spital dhe kërkojnë ndërhyjen e ministrisë së Shëndetësisë dhe Universitetit Mjekësor për të zgjidhur ngërçin.
Kontaktuar nga Ora News, drejtuesja e maternitetit e ka konsideruar këtë një pretendim personal ndërsa u shpreh se do të ketë qëndrimin e saj pas disa ditëve.
Shefi i klinikës së obstetrikës në maternitetin “Koço Gliozheni”, Saimir Cenameri ka denoncuar në media konfliktin krijuar ditët e fundit midis mjekëvë të kësaj klinike dhe drejtueses së institucionit spitalor.
Shefi i shërbimit thotë se ky ngërç po pengon funksioninim normal të punës në spital.
“Problemet konsistojnë në mungesën e përcaktimit dhe zbatimit të kompetencave midis drejtorisë dhe drejtuesve të shërbimit, gjë që sjell si pasojë pengesa në organizimin e punës profesionale, kujdesit ndaj pacientit, zbatimit të rregulloreve dhe protokolleve spitalore, organizimin dhe ndjekjen e shërbimit 24 orë së fundi”, deklaron Cenameri.
Për këtë arsye, mjeku obstetër kërkon ndërhyjen e ministrisë së Shëndetësisë dhe universitetit të Mjekësisë.
“Po i drejtohemi sot institucioneve përgjegjëse, Ministrisë së Shëndetësisë dhe Universitetit të Mjekësisë për të ndërhyrë sa nuk është vonë për të zgjidhur këtë ngërç dhe të sigurojmë mbarëvajtjen e punës në këtë institucion shumë të rëndësishëm spitalor”, vijon Cenameri.
Në lidhje me këtë shqetësim të ngritur në media nga mjeku, Ora News kontaktoi me Ministrinë e Shëndetësisë dhe drejtuesen e maternitetit Rubena Moisu. Ministria e Shëndetësisë tha se nuk ka informacion për situatën e krijuar, ndërsa Znj Moisiu e konsideroi çështjen si pretendim personal dhe tha se do të mbajë qëndrim zytar. /Oranews/
