Nga Boldnews.al
Kreu i shtabit qendror të luftës ndaj armikut të padukshëm, “gjeneral” Edi Rama deri më sot ka guxuar të ndërhyjë jo-ligjërisht në shumë aspekte, përfshi këtu edhe marrëdhëniet mes individëve dhe bizneseve apo individ-individ si në rastin e qerave.
Në emër të luftës, mbylli shkolla e kopshte, pastaja kufizoi lëvizjet, më pas mbylli biznese, dhe arriti deri atje sa të caktonte se vetëm 1 njëri duhet të dilte nga familja për çështje madhore. Si në asnjë vend tjetër të prekur nga Covid 19, panikun ndaj qytetarëve e përhapi pikërisht “gjenerali”, që i mbyllur në bunker, paralajmëronte skenarët më ogurzi, pa u bazuar askund.
Në shërbim të tij nxituan të rrjeshtoheshin me ose pa dashje personazhe të ndryshëm, që fatkeqësisht ose fatmirësisht shfrytëzuan këtë kohë për t´u mediatizuar, duke i shërbyer pikërisht skenarit të panikut.
Gjithçka nisi të funksionojë si një orkestër, ku pas “gjeneralit” dilnin një nga një në orare të ndryshme personazhet, brenda dhe jashtë vendit, që shkuan deri atje sa të caktonin me datë numrin e të viktimave.
Dukej se gjithçka kishte një synim, të injektohej maksimalisht paniku te qytetarët, të legjitimoheshin masat ekstreme, me kosto minimale jo jetësh njerëzore, por kostosh financiare, për qeverinë.
Dhe nga kjo situatë, fitoi një kohë prej gati 3 javësh, për të paraqitur atë që e quajti një paketë ndihmash, por që në fakt duket si një paketë “për të larë duart”. I paqartë për situatën, pa shifra dhe statistika, pa parashikime të besueshme, pa një studim të mirfilltë, dhe mbi të gjitha pa pasur një panoramë të qartë të epidemisë së Covid 19, Rama gjeti si rrugë shpëtimi panikun.
Një popull në panik të skajshëm, që s´duhet të dilte dhe duhet të lante duart nga armiku i padukshëm, nuk do të ndjehej, as do të kërkonte qoftë edhe minimumin për të mbajtur frymën gjallë. Në anën tjetër kjo i krijonte komoditetin një qeverisjeje të paaftë dhe pa asnjë strategji, që të dhuronte show, të fitonte kohën, që e kishte shpërdoruar me ditë e javë, nga momenti i shpërthimit të Covid 19.
“Gjenerali” nisi të krijojë avash figurën e shpëtimtarit të popullit dhe këtë përrallë nisi t´a besojë edhe vetë kur e shpalli veten babai i shqiptarëve, pa të cilin viktimat do mblidheshin me kamionë, njëlloj si në Itali.
Pas citimeve nga librat e shenjtë, që s´dihet sa i beson, sot gjenerali foli për ditën e kiametit. I vetëm në llojin e tij, “gjenerali” vendosi t´ia kujtojë kiametin njerëzve, një ditë pasi shpalli vendimin e rradhës, që ndërhyn direkt në raporte apo marrëveshje individësh me biznesin apo mes tyre, pa pasur asnjë logjikë ligjore.
Në emër të luftës, komandanti po i prek të gjithë, përveç një grupi të vogël, që duket se kanë fituar statusin e të paprekshmëve në kohë paqeje, por edhe lufte.
Deri më sot ata janë të vetmit që nuk cënohen, është oligarkia konçensionare, që përfiton miliona euro nga buxheti në bazë të kontratave të dyshimta, ndërsa “gjenerali” pa iu dridhur zëri thotë se nuk ka para.
Nuk ka para për testet, nuk ka para për të varfërit, nuk ka para për biznesin e vogël, nuk ka para për ata që humbasin vende pune, nuk ka para për ato biznese që nuk janë pjesë e oligarkisë, por ka plot për oligarkinë konçensionare.
Rama na kujtoi kiametin me shpresën se do të dhjetëfishojë panikun dhe njerëzit do të luten që të jetojnë edhe një ditë, dhe kur të gdhihen t´a falenderojnë, pa pasur kohën të mendojnë se s´kanë me se të jetojnë.
