Bill Gates nuk gëzon më privilegjin e të qenit njeriu më i pasur në botë. Edhe pse me një pasuri prej 78.5 miliardë dollarësh, Gates nuk është më i pasuri. Themeluesi i “Zara”-s, Amancio Ortega, e ka kaluar së fundmi këtë shifër.
Aksionet e gjigantit spanjoll të veshjeve “Inditex” (grupi, pjesë e të cilës është “Zara”) janë rritur me 2.5%. Kjo e ka çuar pasurinë e Ortegës në 79.5 miliardë dollarë, sipas revistës “Forbes”.
Por, pavarësisht pasurisë së madhe që ka, pak njerëz e njohin Ortegën. Biznesmeni 80-vjeçar e ruan në mënyrë fanatike privatësinë e tij dhe jep rrallë intervista në media.
Si arriti djali i një punëtori hekurudhe në Spanjën Fashiste, të arrinte kaq shumë?
Ortega e nisi jetën e tij profesionale në moshën 14-vjeçare si një shpërndarës këmishash në Korunja, një qytet i stuhishëm në pjesën veriore të Spanjës. Brenda pak vitesh ai kishte ngritur një dyqan ku shiste të brendshme dhe rroba fëmijësh. Në vitin 1963, me pasurinë 30 mln euro ai themeloi kompaninë e quajtur Confecciones GOA (GOA janë inicialet e tij).
Çështje familjare
Ortega e integroi GOA-n në grupin Inditex, të cilin e ngriti sëbashku me bashkëshorten e tij të parë, Rosalia Mera, dhe që qarkulloi në tregun e aksioneve në vitin 2001. Bashkëshortja e tij e dytë Flora Perez, 61, qëndron tani në bordin e Inditex. Vajza e tyre Marta, 31 vjeç, e cila është trajnuar në firmë, përfshirë dhe praktikën e punës në dyqan, ka shumë gjasa të jetë pasardhësja e firmës. Ortega gjithnjë e gjen kohës që përveç markave të tij, të kujdeset edhe për dy femrat e familjes.
Me sa duket ZARA ka marrë emrin e vajzës së tij?
Në fakt, firma ka marrë emrin nga filmi “Zorba the Greek”, i cili është filmi i preferuar i Ortegës dhe bashkëshortes së tij Rozalisë. Ortega kërkoi një emër alternativ por që do të përmbante shkronjat e Zorba-s. ZARA u hap në Korunja në vitin 1975. Ortega filloi ta zgjerojë biznesin e tij edhe në vendet e tjera të Spanjës, duke “pushtuar” Portugalinë në vitin 1988, SHBA-në vitin që pasoi dhe Francën në vitin 1990. Për të pushtuar Britaninë e Madhe u desh më shumë kohë pasi aty kishte konkurrencë. ZARA e parë në Londër u hap në vitin 1998. Ditët e sotme asnjë qytet nuk konsiderohet si i modës së fundit nëse nuk ka ZARA. Kur Sidnej më në fund mori një degë në vitin 2011, turmat e njerëzve që kërkonin të blinin ishin të mëdha. Ata thoshin: “Faleminderit Zot, më në fund nuk do të jetë një vend i botës së tretë përsa i përket modës”.
