Kuvendi i Kosovës po shqyrton mocionin e mosbesimit ndaj Qeverisë së Republikës së Kosovës, propozuar nga Grupi Parlamentar i Lidhjes Demokratike të Kosovës, perkatesisht të 44 deputetëve.
Në fjalën e tij, kreu i qeverisë së Kosovës, Albin Kurti tha se është i bindur që tashmë ka një marrëveshje për shkëmbim të territoreve. Ai zbuloi edhe muhabete nga takimi i para disa ditëve me presidentin Hashim Thaçi.
“Unë jam më i bindur se kurrë se marrëveshje të gatshme ka. Faktikisht këtë ma ka konfirmuar edhe presidenti në takimin me të. Për dy orë e takova, dhe a e dini çka më tha: ‘Hiqe kryeministër taksën dhe shkojmë në Shtëpinë e Bardhë dhe e heqin qafe Serbinë. Këta kryeministrat tjerë janë kryeministra të emëruar, unë e ti jemi të zgjedhur nga populli’. Pra nuk është ideja me heq këtë Qeveri për taksën, por me heq Qeverinë e me i hap rrugë marrëveshjes. Këto pazare nuk mund të me kenë mua si bashkëpunëtor”, tha Kurti.
Kreu i VV-së Kurti, tha se Qeveria e Kosovës s’mund të rrëzohet vetëm për shkak të një ministri, vetëm nëse ky ministër (Agim Veliu) është plan.
“Nuk rrëzohet qeveria për një ministër. Veç nëse ai ministër është plan. Nëse ministri është plan, atëherë bie qeveria. Unë nuk kam qenë i vetëdijshëm që është plan”, tha Kurti.
Ai tha se pazari presidencial kërkon ta rrëzojë qeverinë e tij.
“Me mua kryeministër e me këtë qeveri nuk ka shpallje të gjendjes së jashtëzakonshme deri të ketë gjendje të jashtëzakonshme”. Më tej ai tha se “Motori i kësaj situate është si të largohet kjo qeveri e si të spostohem unë, për të nisur pazaret”.
Më tej kryeministri i Kosovës tha se kur Hashim Thaçi ka dashur javën e kaluar të shpallë gjendjen e jashtëzakonshme, realisht ka pasur tentim-puç.
“Sot jam i lumtur që nuk është shpallur gjendja e jashtëzakonshme, para një jave ka pasur tentim-puç në Kosovë. Do të dalin të gjitha transkriptet për këtë”, tha Kurti.
