Protagonizmin e humbur me pandeminë që ka prekur edhe vendin tonë, ambasadorët duket se po përpiqen ta marrin, të paktën për pak çaste, me një “mesazh sensibilizimi” për shqiptarët.
Në mesazhin e publikuar në rrjetet sociale nuk thuhet asgjë e re në fakt, përveç këshillave e rekomandimeve të përsëritura sa e sa herë nga mjekë, ekspertë të shëndetësisë, zyrtarë e vetë kryeministri Edi Rama, ai të cilin jo pak syresh janë akuzuar se i shërbejnë në dëm të vendit dhe në shkelje të etikës së detyrës së tyre si diplomatë.
Ambasadorë të selive të huaja diplomatike në vend, që sot përcjellin një mesazh sa për sy e faqe për shqiptarët, kanë mbyllur sytë përpara padrejtësive, korrupsionit, e të zezave të gatuara nga ‘Rilindasit’ në pushtet, në dëm të një kombi të tërë. Janë shfaqur të verbër para kanabizimit të Shqipërisë: asgjë deklaratë kur raportet e agjencive të huaja ligjzbatuese dhe raportimet e mediave [prestigjioze ndërkombëtarë rrëfenin për një Shqipëri që po kthehej në Kolumbinë e Europës, ku me vetë bekimin e ish-ministrit të Brendshëm trafikoheshin tonelata e tonelata me hashash drejt Italisë fqinje. Nuk u ndjenë as kur pasardhësi në detyrë, i siguroi të vëllait trafikant mbrojtje dhe liri, që edhe pse i kërkuar nga autoritet italiane të vijonte biznesin e drogës. Gënjeshtra megjithatë, thonë që i ka këmbët e shkurtra dhe një investigim gazetaresk zbuloi përfshirjen në trafik të Agron Xhafajt, i dorëzuar më pas nga i vëllai që i kishte siguruar imunitet nga ligji deri atë kohë, te autoritet italiane, që e kërkonin për një dënim për trafik droge.
Ka nga ata ambasadorë që përveç heshtjes ndaj së keqes janë tallur me shqiptarët. Ata që teksa qytetarë protestonin për të mbrojtur banesat e tyre nga skrepi i pushtetit, u tregonin gishtin e mesit. Një ofendim i paprecedentë e i turpshëm ai i ambasadorit të OSBE-së Bernd Borchard, i cili bënte viktimën kur në hyrjen e banesës një studente “Shame on You” (Turp të kesh), por që u tall me shqiptarët ashtu siç asnjë zyrtar i kalibrit të tillë nuk kishte guxuar ta bënte më parë.
Ambasadorë që janë akuzuar se në Shqipëri kanë gjetur “El Doradon” me “pluhur të bardhë” dhe “mish të njomë”. Ata që kanë mbyllur sytë dhe kanë folur për sukses kur mazhoranca, hap pas hapi kapte Reformën në Drejtësi, ashti siç u evidentua nga Venecia dhe ODHIR, dy institucionet e rëndësishme europiane të ekspertizës.
Të mësuar me sjelljen prej guvernantësh, ambasadorët në Tiranë duket se janë të dëshpëruar se me përhapjen e koronavirusit kanë humbur protagonizmin.
/BoldNews.al/
