Kryebashkiaku i Tiranës, Erion Veliaj ka qenë kritik në fjalën e tij në takimin që pati me administratorët e Tiranës për sa i përket sharjeve dhe ofendimeve që iu drejtuan ditën e djeshme për trafikun e tmerrshëm që u krijua në rrugët e Tiranës.
Ai u shpreh i ndërgjegjshëm se qytetarët e Tiranës u bllokuan në një trafik që përshkroi gjithë ditën. Veliaj përmendi një studim që ishte bërë se si i shpenzonin paratë shqiptarët.
“Do ishte normale të mendohej se më shumë para shpenzoheshin për fëmijët, për evlatin, për dritën e syve,- tha Veliaj,- por nuk ndodh kështu”.
Pjesa më e madhe e shpenzimeve ikën për makinën, tha kryetari i Bashkisë, sipas të cilit kjo vë në dyshim edhe vlerat e shqiptarëve si njerëz që thonë se duan më shumë fëmijët.
“Dakort dje ra shi, po ditët e tjera që s’ka shi? Me makinë, nga kafja në kafe, për të blerë bukën… Sot kemi proleme me obezitetin, çdo gjë me makinë. Nëse themi ne shqiptarët para çdo gjëje vëmmë fëmijën, hajt të shohim ku po i çojmë paratë dhe gjithë ky dedikim për makinat…” u shpreh Veliaj.
Kryetari i Bashkisë së Tiranës ka patentë për të ngarë makinën, por ende nuk e ka provuar ndjenjën e atësisë, ndaj duket se nuk është shumë i qartë se çfarë flet. Trafiku i rënduar dje në Tiranë erdhi për shkak të bllokimit të papritur të sheshit Skënderbej në një ditë me shi dhe për shkak se Unaza e Vogël ende nuk është hapur, siç ishte premtuar. Për këto arsye lëvizja në kryqytet u paralizua tërësisht, përfshirë edhe ato që nuk kanë makinë por duhej të lëviznin me autobuzet urbanë.
