Policia e Tiranës ka arrestuar 2 sekserët e Universitetit Bujqësor pas publikimit të pamjeve ku ata shfaqeshin me zë e figurë duke marrë para dhe duke kërkuar favore seksuale në këmbim të marrjes së provimeve.
Specialistët e Seksionit për Korrupsionin pranë Drejtorisë Vendore të Policisë Tiranë, në bashkëpunim me Prokurorinë Pranë Gjykatës së Shkallës së Parë Tiranë, bënë të mundur arrestimin e Besim Nasufi, 63 vjeç, banues në Tiranë, ish-përgjegjës shërbimesh për mësimoret në U. B., Tiranë dhe Elison Rota, 38 vjeç, banues në Tiranë, ish-laburant në U. B., Tiranë.
Policia thotë se ndalimi i këtyre shtetasve u bë për arsye se më datat 05. 09. 2016 dhe 06. 09. 2016 në emisioni investigativ Fiks Fare, të televizionit Top Chanel, janë transmetuar pamje filmike, ku dyshohet se në mënyrë korruptive shtetasi Besim Nasufi dhe Elison Rota në bashkëpunim me njeri tjetrin në intervale të ndryshme kohore kanë marrë ryshfet nga student të ndryshëm me qëllim ndikimin te pedagogët e Universitetit Bujqësor Kamëz, për sigurimin e notave kaluese gjatë provimeve.
Nga ana e Specialistëve të Policisë në Drejtorinë Vendore të Policisë Tiranë, vijon puna për dokumentimin e plotë ligjore të veprimtarisë kriminale të personave të tjerë të përfshirë në këtë ngjarje kriminale.
Materialet procedurale i’u kaluan Prokurorisë Pranë Shkallës së Parë Tiranë, për veprën penale të “Ushtrimit të ndikimit të paligjshëm ndaj personave që ushtrojnë funksione publike”.
