Duke nisur nga data 2 mars, Italia ka vendosur një pezullim 30 ditor të afateve për procedimet administrative lidhur me qëndrimin shtetasve të huaj në territorin Italian.
Ministria për Europën dhe Punët e Jashtme informoi sot mbi afatin e qëndrimit të shtetasve të huaj në territorin italian
“Për të gjitha pyetjet e drejtuara drejt Ministrisë për Europën dhe Punët e Jashtme po ashtu dhe Përfaqësive të Republikës së Shqipërisë në botë, ju informojmë se Ministria për Punët e Jashtme dhe Bashkëpunim Ndërkombëtar e Republikës së Italisë ka njoftuar mbi afatet e qëndrimit të shtetasve të huaj në territorin italian pas situatës së emergjencës të krijuar për shkak të COVID-19. Duke nisur nga data 2 mars 2020, është vendosur një pezullim 30 ditor i afateve për procedimet administrative lidhur me qëndrimin e këtyre shtetasve të huaj në territorin Italian”, bën të ditur MEPJ.
“Pezullimi, në kuadër të një situate të forcës madhore, vlen si për procedurat e lidhura me lejet e qëndrimit (aplikim i parë ose rinovim), ashtu edhe për vizat. Për këtë arsye, nuk do u jepet masa e përjashtimit nga territori italian qytetarëve të huaj, të cilët do të gjendeshin në situatë parregullsie, të shkaktuar nga pezullimi i korridoreve të transportit të njerëzve me Republikën e Italisë”, thekson MEPJ.
“Ministria për Europën dhe Punët e Jashtme dhe Përfaqësitë tona Diplomatike do t’ju informojnë për çdo hap të ndërmarrë gjatë këtyre ditëve. Bashkë, kundër këtij armiku , do t’ja dalim!”, thuhet në njoftimin e MEPJ.
