Presidenti i Kosovës, Hashim Thaçi, ka bërë të ditur se e ka nënshkruar dekretin për gjendje të jashtëzakonshme, rreth gjendjes së krijuar nga koronavirusi.
“Bazuar në detyrat e mia kushtetuese si President, pas takimit të sontëm me Këshillin e Sigurimit të Kosovës, kam nënshkruar një dekret për të shpallur gjendjen e jashtëzakonshme në mes të situatës së krijuar nga shpërthimi i # COVID19”, ka shkruar Thaçi në “Twitter”.
Propozimin për gjendje të jashtëzakonshme Thaçi e dha mbrëmjen e djeshme, gjatë një konference shtypi pas takimit të Këshillit të Sigurisë Kombëtare.
Por nga Qeveria Kurti, propozimi i tij u konsideru si masë ekstreme dhe e panevojshme. Këtë e deklaroi zv/kryeministri i dytë i Kosovës, Haki Abazi, pas takimit të Këshillit të Sigurisë Kombëtare.
“Ajo që është propozuar si gjendje e jashtëzakonshme konsiderohet dhe shihet si masë ekstreme dhe e panevojshme, që mund të interferojë me masat adekuate, të cilat i ka marrë Qeveria dhe institucionet e Kosovës”, ka deklaruar Abazi.
“Si rrjedhojë, kryeministri nuk është në pajtueshmëri me masën ekstreme të shpalljes së gjendjes së jashtëzakonshme, të cilën e ka propozuar presidenti sonte”, ka shtuar ai.
