Trajneri i Atletico Madrid, Diego Simeone, u bëri thirrje njerëzve që të qëndrojnë në shtëpi, për të parandaluar përhapjen e “Coronavirus” dhe mbrojtur njerëzit pranë nesh.
Ndeshjet e futbollit në Spanjë janë shtyrë për të paktën dy javët e ardhshme, në përpjekjet për të luftuar përhapjen e COVID-19, i cili vazhdon ta gjunjëzojë sportin, por jo vetëm, në të gjithë globin.
Simeone përdori rrjetet sociale, ku apeloi për ndërgjegjësim e kujdes nga të gjithë: “Doja t’ju dërgoja një mesazh ndërgjegjësimi. Nga shtëpia ime, ju ftoj të gjithëve të ndiqni rregullat e vendosura nga ekspertët, duke u kujdesur për veten tonë dhe të gjithë ata që na rrethojnë. Le të qëndrojmë në shtëpi”.
Deri më tani janë konstatuar më shumë se 6000 raste të “Coronavirus” në Spanjë, me mbi 190 vdekje.
