Futbolli në Spanjë momentalisht ka ngrirë, pas përhapjes në masë të coronavirusit e cila pak ditë më parë u shpall si pandemi botërore nga OBSH-ja.
Me mundësinë që në këtë sezon nuk do të luhet më asnjë ndeshje, kampioni i La Ligës dhe ato që skuadra që do të bien një kategori janë pikëpyetje të mëdha. Për t’ju adresuar këtyre shqetësimeve presidenti i La Ligës, Luis Rubiales, ka konfirmuar se janë 4 skenarë të ndryshëm për fatet e La Ligës.
Skenari i parë: Të luhen të gjitha ndeshjet e mbetura
I pari është që të luhen të gjitha ndeshjet e këtij sezoni. Gjithsesi mbetet të shihet se çfarë do të ndodhë. Deri më tani janë shtyrë dy javë, por mund të ketë edhe më tej pezullim dhe ky skenar bëhet edhe më i vështirë. Gjithashtu pritet edhe një vendim i UEFA-s për takimet ndërkombëtare, që do ta rëndonin edhe më shumë kalendarin.
Skenari i dytë: Sezoni të shpallet i pavlefshëm
Skenari i dytë është ai që e bën nul këtë sezon. Nuk do të ketë ekipi kampion, nuk do të ketë skuadra të rëna dhe sezoni i ardhshëm do të niste me të njëjtat ekipe në garë.
Skenari i tretë: Sezoni të mbaroi tani në javën e 27-të
Skenari i tretë është që kampionati të konsiderohet i përfunduar në javën e 27 dhe klasifikimi aktual të merret si përfundimtar, ndërsa Barcelona do të shpallej kampione e La Ligës.
Skenari i katërt: Fati i kampionatit të bazohet në rezultatet e gjysmës së parë të sezonit
Serish këtu kampione do të shpallej Barcelona, falë golaverazhit. Gjatë fazës së parë Reali dhe Barcelona të dyja kishin grumbulluar 40 pikë por katalanasit kishin golaverazh më të mirë. Atletico Madrid do të shkonin në Europa League, kurse Mallorca, Leganes dhe Espanyol një kategori më poshtë. Opsioni tjetër është edhe luajtja e një faze “play-off” për titullin dhe një “play-out” për rënien, sikurse po mendohet në Itali.
