Kandidati republikan për President të SHBA-së, Donald Trump, ka anuluar takimin e tij elektoral në Universitetin e Çikagos pasi ka qenë i pasigurt pas tensionimit të situatës brenda hapësirave të këtij institucioni.
Mijëra studentë, mbështetës dhe kundërshtarë të kandidatit republikan, ishin mbledhur në sallën kur Donald Trump ishte planifikuar të mbante një takim dhe në episode të caktuara nuk munguan as konfrontimet fizike, për çka detyruan policinë të arrestonte disa persona.
Takimi ishte planifikuar për të premten në mbrëmje, por përplasjet mes atyre që përkrahnin miliarderin me grupin që ishin mbledhur për ta kundërshtuar, detyruan marrjen e një vendimi të tillë.
Kur pritej që Trump të hynte në sallë, njëri prej personave ta angazhuar në fushatën e miliarderit doli në podium dhe njoftoi se takimi ishte anuluar për “arsye sigurie”.
Deri më tani, nuk është njoftuar nëse Trump do të mbajë takimin në një datë tjetër.
