Një rast i trafikut ndërkombëtar të drogës Shqipëri-Greqi-Turqi është goditur nga autoritetet greke, ku është kapur një sasi prej 1.2 tonë drogë në Athinë.
Mediat fqinje bëjnë me dije se operacioni është zhvilluar ditën e shtunë, por është publikuar sot.
Raportohet se një rulotë ka kaluar pikën kufitare të Qafë-Botës, duke hyrë në Greqi dhe duke vazhduar udhëtimin. Ka qenë anti-droga e Igumenicës, në bashkëpunim me atë të Athinës, që ka ndaluar rulotën në kryeqytetin grek, ku gjatë kontrollit është zbuluar sasia e madhe e drogës, përkatësisht 1 ton e 145 kg marijuanë, 4 kg e 68 gram hashash çokollatë, si dhe 918 gram vaj hashashi.
Mësohet se vlera e drogës së kapur në treg arrinte në 1 milionë e 730 mijë euro. Në pranga kanë rënë dy drejtuesit e rulotës, përkatësisht burrë e grua, ndërsa një tjetër është shpallur në kërkim.
Mediet greke kanë publikuar pamjet e operacionit, ndërsa nuk dihet ende identiteti dhe kombësia e të arrestuarve.
