Motivacioni i paraqitur nga Edmond Haxhinasto për dorëheqjen nga Ministria e Transporteve nuk bindi.
Për këtë arsye LSI e përforcoi me një deklaratë të Petrit Vasilit, të shpërndarë disa minuta pasi lajmi u bë publik. As sqarimi i LSI nuk i sheshoi dyshimet. Arsyeja e largimit të Haxhinastos vërtitet mes pakënaqësive që ka ndaj tij Ilir Meta, atyre të kryeministrit Rama ose ndaj “pazarit” të radhës mes të dyve. Petrit Vasili, nënkryetari i LSI, u shfaq sërish në publik për të sqaruar se asnjë nga këto skenarë nuk qëndron. Haxhinasto e Meta nuk kanë asnjë mosmarrëveshje mes tyre, tha ai për Report Tv.
“Këtu më lejohet të jem kategorik. Nuk ka asnjë histori të tillë! Çështje të tilla kaq madhore, natyrisht kërkojnë kualitete politike të spikatura. Haxhinasto ishte dhe është një i tillë, është njeri që është ngarkuar me programin e partisë prej kohësh. Më kujtohet pas zgjedhjeve të vitit 2013 kur u ngarkua nga LSI për rakordimet e programit me Beqajn e PS dhe nëkëtë funksion investon më të mirën aty ku duhet”, u shpreh ai.
Vasili hedh poshtë edhe variantin tjetër. Ai thotë se nuk janë pakënaqësitë nga radhët e mazhorancës ata që e detyruan Haxhinaston të largohet.
“Ka pasur deputetë të PS që kanë kritikuar fort ministrat e LSI. Por kjo nuk ka asnjë gjë të keqe”.
Haxhinasto ka qenë ministër i LSI edhe nën qeverinë Berisha, ku ka mbajtur edhe postin e zëvendëskryeministrit. Në 3 vitet që drejtoi Ministrinë e Transporteve, investimet në infrastrukturë janë pakësuar ndjeshëm dhe shumë rrugë nuk kanë përfunduar, pavarësisht se në shumë raste ka qenë vetë Haxhinasto që ka premtuar mbylljen e tyre brenda afateve. Afatet kanë kaluar dhe kostoja i është faturuar qeverisë. Dështimet në këtë drejtim janë një tjetër variant për arsyen e largimit të tij. /Lapsi.al
