Lëvizja Vetëvendosje me qendër në Shqipëri është në mbështetje të protestës së banorëve të Zall Gjoçajt përpara Bashkisë Mat.
“Institucionet publike duhet të jenë së pari e mbi të gjitha, në shërbim publik të mbrojtjes së interesave të komunitetit të qytetarëve që i ka zgjedhur ato.”-shkruan Vetëvendosje.
Reagimi i plotë:
“Në datën 6 mars 2020, ditën e premte, në ora 12:00, banorët e zonës së Zall Gjoçajt do të organizojnë protestë përpara Bashkisë Mat në qytetin e Burrelit, kundër ndërtimit të HEC-eve Sekë dhe Zais në Parkun Kombëtar “Lurë-Mali i Dejës”.
Institucionet publike duhet të jenë së pari e mbi të gjitha, në shërbim publik të mbrojtjes së interesave të komunitetit të qytetarëve që i ka zgjedhur ato.
Një gjë e tillë nuk po ndodh me Bashkinë e Matit, që përfshin zonën e Zall Gjoçajt, ku një kompani private do të ndërtojë dy HEC-e, në mënyrë të kundraligjshme, duke shkatërruar pasuritë natyrore të parkut kombëtar “Lurë-Mali i Dejës” dhe duke u prerë furnizimin me ujë të pijshëm mbi 10 mijë banorëve të zonës.
Për shkak të tërheqjes së shtetit nga detyrimet e veta ndaj qytetarëve, dhe mbrojtjes që u jep interesave të ngushta të kompanive, edhe në këtë rast, Bashkia e Matit ka shkelur detyrimet e saj dhe ka lënë mënjanë kompetencat e veta ligjore në mbrojtje të interesit publik.”-shkruan Vetëvendosje.
