Forca të shumta policie, FNSH-të dhe RENEA vijojnë prej orësh operacionin për kapjen e David Qosjas, personit që vrau efektivin Ardian Kodra në Lezhë. Së fundmi në banesën e tij është hedhur edhe gaz lotsjellës.
Banesa ku ndodhet Qosja, për të cilin thuhet se është i sëmurë mendor mbahet e rrethuar ndërsa është zgjeruar perimetri i sigurisë. Janë larguar të gjithë banorët që kanë shtëpitë afër me personin e armatosur.
Forcat RENEA i kanë bërë thirrje agresorit të dorëzohet. Ai herë pas herë qëllon me automatik dhe kundërshton të dorëzohet. Sipas burimeve brenda drejtuesve të operacionit, policia edhe mund të ndërhyjë për eliminimin fizik në rast se nuk arrihet të neutralizohet.
David Qosja njihet si person me probleme mendore në fshatin e Torovicës. Mëngjesin e sotëm ai i kishte vënë flakën pyllit dhe më pas me automatik kishte qëlluar nëpër fshat, cka ka sjellë edhe ndërhyrjen e policisë.
