Marrëdhënia mes Federatës Shqiptare të Futbollit dhe ish-teknikut të Kombëtares është shndërruar zyrtarisht tashmë në një konflikt të hapur dhe përballje gjyqësore njërit prej të cilëve pritet kushtojë jo pak.
Kjo sepse pretendimet e ish-teknikut kuqezi janë dërguar në Gjykatën e Lozanës nga vetë ai ndërsa mbrohet nga avokati Antonio Rigozzi ndërsa shuma e kërkuar prej tij është 57 mijë euro.
Panuçi është larguar nga drejtimi i ekipit pa dakortësinë e tij, ndërsa ai pretendon marrjen e bonuseve që sipas kontratës së tij për periudhën që ia drejtonte kombëtaren tonë, kishte një klauzolë për të cilën barazimet e arritura në shtëpi kanë një shpërblim prej 4000 eurosh, në transfertë 8000, ndërkohë që fitoret e arritura në shtëpi arrijnë shifrën e bonusit prej 10.000 eurosh dhe fitorja në transfertë 15.000.
“Fax Web” raporton që refuzimi i dorëheqjes së 46-vjeçarit pas humbjes me Turqinë në “Loro Borici” më 23 marsin e 2019-s duke u paguar deri në fund të vitit të shkuar me një pagë prej rreth 20.000 eurosh në muaj ka shërbyer edhe si një shkëndijë e hapjes së këtij konflikti dhe ngritjes së pretendimeve të tij.
Bilanci i Christian Panuçit në krye të Shqipërisë ishte 15 ndeshje me vetëm 4 fitore, 2 barazime dhe 9 humbje. Nga ana e saj, FSHF i ka sqaruar ish-trajnerit që shpërblimet ishin të vlefshme për aq kohë sa ai ishte në krye të pankinës kuqezi por me sa duket kjo përgjigje nuk ka funksionuar.
Ajo çfarë do të rëndojë në bilancin përfundimtar të palës që do të humbasë në këtë proces, përveç të tjerave janë edhe kostot e gjyqit. Përveç 57 mijë eurove, Panuçi ka kërkuar që FSH të paguajë edhe shpenzimet e gjyqit që kanë një kosto përafërsisht sa dyfishi i këtij pretendimi.
Ende nuk ka një datë të bërë publike se kur do të zhvillohet seanca e parë ndërsa palët kanë një afat 3 mujorë.
Që prej ikjes së Panuçit nga pankina kuqezi, kombëtarja drejtohet nga një tjetër italian, Edi Reja.
