Djali i “gjeneralit” Nehat Kulla, i cili u arrestua dy ditë më parë si i dyshuar për grabitjen e bankës tek ish¬Blloku, ka mohuar akuzën.
Para hetuesve ai ka dhënë alibinë e tij se ditën e grabitjes së bankës ka qenë në plazh.
Robert Kulla ka deklaruar se i njeh dy personat e tjerë që u arrestuan, por nuk ka asnjë lidhje me grabitjen e bankës.
I ndaluari ka shpjeguar se paratë që iu sekuestruan në momentin e arrestimit ishin një pjesë e borxhit që Roland Liti dhe Alan Babameto i detyroheshin prej më shumë se një muaji. Burime nga Policia thanë se 35¬vjeçari ka shpjeguar edhe arsyen e borxhit, duke thënë se ai ka një dyqan pengjesh në Tiranë dhe Liti e Babameto kanë shkuar aty duke lënë peng një makinë, për shumën 25 mijë euro.
Kjo pjesë e dëshmisë së tij është verifikuar nga ana e oficerëve të Policisë dhe rezulton e saktë, por pa përjashtuar përfshirjen e tij në ngjarje. Burimet thanë se bëhet fjalë për njërën nga makinat që u sekuestrua gjatë operacionit “Depërtimi”, automjetin tip “Benz ML”, me targa AA 205 KA. Nga ana tjetër, burimet e hetimit thanë se të dyshuar për vjedhjen janë tre personat, pa përjashtuar asnjërin prej tyre.
