Rredjan Rraja, i arrestuar për atentatin ndaj prokurorit të Durrësit Arjan Ndoja, ka ankimuar në Gjykatën e Lartë (dhe pse ende jofunksionale) vendimin për masën e sigurisë arrest me burg, dhënë ndaj tij.
Sipas hetimeve: Pasditen e 1 Nëntorit 2019, rreth orës 16:13, pranë mbikalimit të Shkozetit në autostradën Durrës-Tiranë, në ndjekje e sipër, persona të paidentifikuar duke udhëtuar me një mjet tip “Benz” kanë qëlluar me armë zjarri nga mjeti i tyre për të vrarë shtetasit Arjan Ndoja, 42 vjeç, me detyrë prokuror pranë Prokurorisë së Gjykatës së Shkallës së Parë Durrës, Andi Maloku, 24 vjeç dhe Aleksandër Laho, 46 vjeç, të cilët kanë qenë duke udhëtuar nga Durrësi në drejtim të Tiranës me mjetin tip “Benz”, të Prokurorit Arjan Ndoja, ku për pasojë, kanë mbetur të plagosur të tre këta shtetas.
Andi Maloku, i cili ishte shoferi i mjetit, ndërroi jetë në spital disa ditë më pas.
Në mjetin që dyshohet të jetë përdorur nga autorët në atentat, i zbuluar nga policia disa orë pas krimit, hetuesit gjetën një palë syze, në të cilat u evidentuan gjurmë të gishtave të Rrajës. Kjo ka qenë prova më e fortë e prokurorisë kundër të vetmit të arrestuar për ngjarjen. Rredjan Rraja, i vënë në pranga pak ditë pas krimit, por edhe avokati i tij, kanë mohuar përfshirjen në krim.
Prej më shumë se një viti, Gjykata e Lartë, ku Rraja ka bërë ankim, është jashtë funksionit. Nga anëtarët e mëparshëm, një pjesë u larguan në përfundim të mandatit, ndërsa disa të tjerë u shkarkuan nga procesi i Vetingut. Në detyrë është vetëm anëtari Ardian Dvorani, të cilit ka disa vite që i ka përfunduar mandati.
