Realizohet pas gjysmë shekulli fluturimi i parë komercial mes Shteteve të Bashkuara të Amerikës dhe Kubës, duke hapur kështu një kapitull të ri të adminitratës Obama me ish-armikun e Luftës së Ftohtë.
I nisur nga Florida i Shteteve të Bashkuara, avioni i pasagjerëve zbarkoi në qytetin kuban Santa Klara, një udhetim të cilin Obama shpreson që të shndërrohet në rutinë për vitet që vijnë me ishullin komunist.
Santa Klara ka rreth 200 mijë banorë dhe është i njohur për monumentin e liderit revulucionar Che Guevara.
Mes pasagjerëve në bordin me 150 vende te avionit Airbus A320 ishte sekretari i Transportit të SHBA Anthony Foxx, kreu ekkzekutiv i kompanisë JetBlue Robin Hayes, zyrtarë të tjerë, gazetarë e fotoreporterë.
Udhëtarët e rregullt, përfshirë disa me origjinë kubane, zunë gati gjysmën e vendeve në një rrugë e cila mund të jetë një sfidë tregtare, të paktën në fillimet e saj.
Sekretari Amerikan i Shtetit, John Kerry, shkroi në twitter se fluturimi i parë u krye pak më shumë se një vit pas ngritjes së flamurit në Ambasadën amerikane në Havana.
Ai e konsideroi fluturimin një tjetër hap përpara në marrëdheniet mes dy vendeve.
Kuba dhe Shtetet e Bashkuara të Amerikës filluan normalizimin e marrëdhënieve në dhjetor të 2014 pas 18 muaj bisedime sekrete, duke vendosur edhe lidhje të plota diplomatike mes tyre.
Vendet kanë qenë në armiqësi për më shumë se pesë dekada, pasi Fidel Castro rrëzoi diktatorin e mbështetur nga SHBA, Fulgencio Batista, në një revolucion në 1959, i cili e drejtoi vendin në një kurs komunist dhe e bëri atë një aleat të ngushtë të Bashkimit Sovjetik.
Deri në fluturimin e parë, lidhjet ajore mes Kubës dhe Shteteve të Bashkuara bëheshin vetëm me çarter.
Në kuadër të rivensosjes së marëdhënieve mes dy vendeve, Presidenti Barak Obama vizitoi ishullin Karaibe në mars dhe ka marrë një sërë masash për të forcuar lidhjet tregtare, por nuk ka qenë në gjendje të bindë Kongresin për të hequr embargo e gjatë.
