Policia e Shtetit arrestoi disa persona një ditë më parë, pasi po tentonin të fusnin në Shqipëri lëndë të rrezikshme për shëndetin e njeriut. Për ngjarjen e ndodhur në Vlorë, reagoi dhe ish-deputeti i Partisë Demokratike Fatbardh Kadilli, i cili ngre akuza se personat e arrestuar janë miq të Kryeministrit Edi Rama dhe kryebashkiakut për të Vlorës Dritan Leli.
“Çfarë po i bëni Vlorës? Një krim i rëndë është raportuar në Vlorë! Nuk është me vrasje, apo zhdukje njerëzish! Është raportuar një krim, që nuk ndodh pa bashkëpunimin me shtetin. Nuk ndodh, pa bashkëpunim me mafien ndërkombëtare. Një traget, që u brohorit nga qeveritarët si tregues i zhvillimit në Vlorë, qënka trageti i vdekjes. Shërbimi i tragetit nuk është nje aktivitet dosido! Fuçi me lëndë kimike të rrezikshme, ishin ngarkesë e rregullt e tragetit. Dihet që liçensat i jepen të preferuarve të pushtetit. Agron Brati, drejtor i agjencisë, vëlla i një drejtuesi të lartë socialist dhe mik i kryetarit të bashkisë, Leli (shih foto 1). Zamir Kormuzi, biznesmeni që kryen këtë punë mik i KM Rama (shih foto 2). Trafikimi i mbetjeve është biznes i mafies, por që nuk bëhet pa kapur institucionet. Ku shkarkoheshin? Çfarë ndotnin kriminalisht? Tokën apo detin e Vlorës? Cili është roli i “deputetit” të Vlorës Rama? Po i Lelit”, pyet Kadilli.
Sipas tij, e vërteta do të zbardhet nëse pala italiane do t`u shkojë deri në fund hetimeve.
“Këto do të sqarohen vetëm nëse hetimi nga pala italiane i shkon gjerave deri në fund, dhe nuk ndalon në mezzocanal. Kjo do të sqarohet kur vlonjatët ta kapërcejnë krenarinë e tyre, dhe të shikojnë se çfarë po i bën Vlorës ai që e kanë pranuar për deputet, që e kanë sot KM dhe që mundohet t’i gënjejë me zanatin e bojatisjes e zbukurimeve, sic ka genjyer më parë Tiranën dhe sot Shqipërinë. Ky krim në Vlorë është më i rëndi! Pasojat e këtij krimi nuk shpaguhen dot lehtë”, shton ai.
Lidhur me rastin, reagoi dhe kreu i Departamentit të Mjedisit në PD, Jamarbër Malltezi.
“Ia kane ul me zor ne tryeze… Me ligj apo pa ligj po e mbyt vendin me mbetjet e rrezikshme”, shkruan ai në një postim në FB.
