Dy persona janë vënë në pranga në kuadër të operacionit të koduar “Selita”, pasi posedonin dhe shpërndanin lëndë narkotike kokainë.
Të arrestuarit janë shtetasit L. T., 33 vjeç dhe V. T., 28 vjeç, të dy banues në Selitë, Tiranë.
Sipas policisë, blutë e kryeqytetit kishin marrë informacione se këta shtetas në bashkëpunim me njëri-tjetrin merreshin me shpërndarje kokaine, në zona të ndryshme të Tiranës, kryesisht në zonën e ish-Bllokut, Komunës së Parisit dhe Tiranës së Re.
Policia e ka ndaluar për kontroll në rrugën “Prokop Mima” automjeti tip “Smart”, me drejtues L. T. dhe pasagjer V. T. dhe gjatë kontrollit fizik dhe në banesën e shtetasit L. T, burime zyrtare bëjnë me dije se u gjet 402.7 gramë lëndë narkotike, e dyshuar kokainë, një pjesë e së cilës ishte ndarë në doza gati për shitje, një peshore elektronike, 5 aparate celular dhe një sasi parash të dyshuara të përfituara nga shitja e lëndës narkotike.
Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore, për veprën penale ”Prodhimi dhe shitja e narkotikëve”, e kryer në bashkëpunim.
