Policia ka ekzekutuar një aksion të befasishëm gjatë natës që shkoi në qytetin e Elbasanit, duke shoqëruar dhjetëra persona në komisariat. Ky aksion kishte si qëllim për të goditur ushtrimin e aktivitetit të paligjshëm të lojërave të fatit.
Burime pranë policisë bënë me dije se personat e shoqëruar janë kryesisht administratorë të lokaleve të ndryshme, që kanë ushtriuar aktivitetin e lojërave të fatit gjatë viteve të fundit.
Mësohet se uniformat blu gjatë aksionit kanë sekuestruar pamje filmike të kamerave të sigurisë të lokaleve, ku dyshohet se kohë pas kohe në mënyrë të fshehtë organizohen lojëra të palejuara të fatit. Gjithashtu mësohet se janë sekuestruar dhe aparatet e celularëve të administratorëve të lokaleve për të parë nëse kanë luajtur lojëra fati përmes telefonit.
Ende nuk ka një informacion zyrtar në lidhje me këtë aksion të policisë dhe nëse ka të arrestuar.
