Të shtëna me armë zjarri në dy lokale të ndryshme në Hanau të Gjermanisë kanë lënë si pasojë 11 viktima dhe disa të tjerë të plagosur.
Ngjarja e tmerrshme ndodhi rreth orës 22:00 të mbrëmjes së të mërkurës.
Mediat vendase raportojnë se autori i krimit hapi zjarr në lokalin e parë të shishave në qendër të qytetit Hanau, duke vrarë katër persona. Pak më vonë, ai udhëtoi në lagjen Kesselstadt ku përsëri në një tjetër bar me shisha, vrau 5 persona. Sipas mediave lokale, mes viktimave ka edhe persona kurdë.
Autori i dyshuar i ngjarjes u gjet më vonë i vdekur në banesën e tij, bashkë me trupin e pajetë të një personi tjetër. Autoritetet gjermane thonë se autori ka vepruar i vetëm, megjithatë hetimet vazhdojnë. Ndërsa motivi i sulmit mbetet ende i paqartë.
Gazeta Bild raportoi se i dyshuari ishte një shtetas gjerman, i cili kishte leje për të mbajtur armë zjarri. Dëshmitarët okularë në vendin e ngjarjes thanë se kishin dëgjuar disa të shtena me armë zjarri.
“Unë jetoj rreth 50 metra larg vendit ku ndodhi ngjarja. Kur u ktheva në shtëpi dhe mbylla derën, atëherë dëgjova gjashtë të shtënat. Unë besoj se kjo ishte gjashtë ose shtatë minuta pasi kisha ecur para me dy fëmijët e mi të vegjël. Më pas hapa dritaren dhe pashë njerëzit që ishin duke vrapuar dhe dhe duke bërtitur. Brenda afro pesë minutash, policia ishte në vendin e ngjarjes”, tha një prej dëshmitarëve, raporton DW.
Politikania e lartë e CDU-së, Katja Leikert, e cila përfaqëson elektoratin Hanau në parlamentin kombëtar të Bundestagut shprehu ngushëllime për të afërmit e viktimave dhe të lënduarit.
“Në këtë natë të tmerrshme në Hanau jam pranë të afërmeve të viktimave. Shpresojmë që të lënduarit të shërohen shpejt. Është një skenar i tmerrshëm për të gjithë ne. Faleminderit për shërbimet e urgjencës”, tha Leikert.
Kryetari i komunës Hanau, Social Demokrati Claus Kaminsky tha se ishte kjo ishte një natë e tmerrshme.
“Kjo ishte një mbrëmje e tmerrshme me të cilën jam i sigurt se do të merremi me dhe kujtojmë me trishtim për një kohë të gjatë” tha ai.
