Të shtëna me armë zjarri janë shënuar në Vorë, në periferi të kryeqytetit, në vazhdën e një konflikti mes disa personash. Nga policia konfirmohet se nuk ka persona të lënduar nga të shtënat, ndërkohë që tre persona janë vënë në pranga si dhe është sekuestruar një pistoletë, fishekë, si dhe një shufër metalike.
Ngjarja
Burime zyrtare bënë me dije se specialistët për Hetimin e Krimit në Komisariatin e Policisë Vorë, u njoftuan për një konflikt të çastit në rrugën “Rinia”, ku disa persona ishin konfliktuar me njëri – tjetrin dhe njëri prej tyre kishte qëlluar me armë zjarri.
Efektivët shkuan në vendngjarje dhe vunë në pranga në tentativë për t’u larguar, duke mos iu bindur urdhrit të Policisë për të ndaluar, shtetasin: L.B., 28 vjeç, banues në Vorë, i cili u arrestua për veprat penale “Armëmbajtja pa leje” dhe “Mosbindja ndaj urdhrit të punonjësit të policisë së rendit publik”.
Arrestimi i tij u krye, pasi ky shtetas, në bashkëpunim edhe me shtetasit A.E. dhe G.SH, në rrugën ”Rinia”, në Vorë, kanë goditur me sende të forta shtetasit B.T., E.T. dhe R.T.
Po ashtu, u bë arrestimi në flagrancë edhe i dy personave të tjerë:
A.E., 29 vjeç, banues në Vorë, për veprat penale “Prodhimi, mbajtja, blerja apo shitja pa leje e armëve të ftohta“ dhe “Plagosja e lehte me dashje”;
G.SH., 32 vjeç, banues në Vorë, i cili u arrestua për veprat penale “Prodhimi, mbajtja, blerja apo shitja pa leje e armëve të ftohta“ dhe “Plagosja e lehtë me dashje”.
