Kryeministri Edi Rama ka bërë të qartë se mazhoranca do ta votojë e vetme pa konsensusin e opozitës projektligjin për Vettingun, procesin e skanimit të gjyqtarëve dhe prokurorëve.
Duke folur në seancës e jashtëzakonshme për këtë ligj, kreu i Qeverisë u shpreh se opozita nuk do që ta votojë këtë pr/ligj dhe se konsensusi që kërkon pakica bie ndesh me rregullat që përcakton integrimi evropian.
“Ata që u detyruan ti bashkohen konsensusit në këtë sallë për arsye se presioni popullor dhe presioni i partnerëve dhe miqve tanë ndërkombëtarë ishte kolosal, nuk habitem pse nuk festojnë me ne një fitore tjetër. Jemi gati të festojmë si atë natë dhe nuk e kuptoj pse po ndaheni nga treni i fitores. Jam i bindur se këtë e kupton çdo shqiptar. Shqiptarët e dinë shumë mirë se kush e ka penguar drejtësinë në Shqipëri që të normalizohet. Këtu ka vetëm një gjë për të bërë; të votojmë këtë ligj kaq të rëndësishëm. Nuk mund të ketë një konsensus alla-shqiptarçe që bie ndesh me rrugën e integrimit evropian”, tha Edi Rama.
Kryeministri shtoi gjithashtu se reforma në drejtësi ka qenë në programin e këtij koalicioni qeverisës, që është i vetmi që nga viti 1992.
“Prandaj them që ta votojmë këtë ligj si shumicë duke vazhduar me koherencë të plotë të mbrojmë themelet e programit tonë qeverisës, me vendosmëri zotimet tona përpara shqiptarëve. Jemi i pari koalicion që nga viti 1992 që e kemi shkruar në program, reformë në drejtësi. Sepse ju nuk vazhdoni të bëni sikur e doni reformën në drejtësi, të bëni sikur kontribuoni për të përmirësuar draftet, kjo është sa e lehtë për t’u kuptuar aq edhe për të ardhur keq. Nuk ju lë dot ajo që keni thellë në barkun e shtëpisë suaj”, bëri me dije Kryeministri Edi Rama.
Konsensusi i arritur më 22 korrik mes mazhorancës dhe opozitës për draftin e reformës në drejtësi përcakton se ligji i Vettingut do të bëhet nga BKH. Opozita pretendon se ky pr/ligj është ndryshuar në mënyrë të njëanshme nga mazhoranca.
