Duhej të ishin ditë të lumtura për sulmuesin Odion Ighalo, i cili është blerë në merkaton e janarit nga Manchester United. Përkundrazi, lojtari nuk ka mundur ta veshë akoma fanellën e Djajve të Kuq, sepse është vënë në karantinë për shkak të Coronavirus-it.
Sulmuesi, në fakt, është transferuar tek United nga klubi kinez i Shanghai Shenua dhe është detyruar të veçohet nga skuadra si masë parandaluese.
Një problem ky që i është shtuar trishtimit për humbjen pak kohë më parë të motrës Mary, e cila ishte edhe një tifoze e madhe e Manchester United.
Ighalo ka folur për gjendjen e tij shpirtërore në një intervistë të dhënë për The Sun: “Ndiej një dhimbje të madhe. Mary ishte një nënë për të gjithë ne, kujdesej për mua kur isha i vogël”, ka thënë ai.
“Po mundohem të jem i fortë si burrë, por shpeshherë qaj. Më mungon. Motra ime ishte një tifoze e madhe e Manchester United. Jemi rritur duke e parë në tv. Burri i saj është tifoz i Chelsea-t dhe fëmijët te Manchester City-t”.
“Por ajo i ka qëndruar besnike Djajve të Kuq dhe lutej që një ditë unë të luaja me ata. Pjesa më e dhimbshme, tani, është se ëndrra e saj është realizuar, por ajo nuk është këtu për ta parë”.
