Një shtetas shqiptar është shpallur fajtor për sulm seksual nga një gjykate në Rutherglen të Australisë.
Bëhet fjalë për shtetasin Edison Bala, 29-vjeç, i cili në maj të 2018 ka ngacmuar seksualisht një 23-vjeçare, në një klub nate të mbushur me njerëz, në Kilbride.
Sipas mediave vendase, shqiptari e la të renë të gjakosur, pasi i hoqi me forcë të brendshmet.
23-vjeçarja ka rrëfyer për mediat australiane pasojat e rënda që i la kjo ngjarje. Ajo pranon se nëqoftëse nuk do të ishte për mbështetjen e prindërve të saja, nuk do t’ia kishte dalë të vazhdonte më tej jetën. Përveç dëmtimeve fizike, vajza përjetoi edhe dëmtime psikologjike që u shoqëruan me depresion dhe ankth. Ajo ka treguar se jeta e saj u shkatërrua dhe si pasojë e gjendjes së rënduar psikologjike goditi veten me thikë në stomak.
23-vjeçarja është shprehur gjatë rrëfimit se jeta e saj pas ngjarjes ka qenë një ferr i vërtetë.
“Jeta ime është shkatërruar plotësisht. Unë kam luftuar me mendimet e vetëvrasjes, kam dëmtuar veten dhe jam diagnostikuar me depresion dhe ankth. Këto dy vjet kanë qenë një ferr i vërtetë. Ndalova së jetuari, nuk po kujdesesha më për veten time. E urreja veten time, e urreja atë që ai bëri me mua. Ndjehesha pa vlerë dhe nuk mund ta shikoja dot veten në pasqyrë”.
Ajo punonte në industrinë e hotelierisë dhe kishte shkuar me miqtë pas mesnatës në një klub nate, ku ndodhi edhe ngjarja. 23-vjeçarja e përshkruan veten si një person miqësor dhe që i flet gjithkujt.
“Ai ishte tek zona e duhanpirësve. Duke qenë miqësore unë i thashë përshëndetje, por kuptova që ai nuk fliste anglisht dhe u largova. Ai më ndoqi nga mbrapa dhe më sulmoi seksualisht”.
Vendimi për Balën pritet të jepet nga gjykata javën e ardhshme.
