Mesditën e djeshme, kompanitë celulare rritën ofertat me 200 lekë secilën dhe për më tepër në të njëjtën kohë. Një shifër e lartë në raport me ekonominë shqiptare, ndërkohë që Autoriteti i Konkurrencës nuk ka reaguar fare në lidhje me këtë.
Përmes një postimi në rrjetet sociale, “Nisma Thurje” ka reaguar ashpër ku shkruan se kompanitë celulare këtë akt e kanë bërë jo se po dilnin me humbje, por sepse nuk po fitonin aq sa të ndiheshin të ngopur.
“Kur shohin që këtë popull e rrjep qeveria me tendera, e rrjepin miqtë e qeverisë me PPP-të, e rrjepin oligarkët me monopolet, përse mos ia vënë dhe ata pak shkelmin në fyt? Çfarë i pengon?” – shtron pyetje shtron “Nisnma Thurje” në postimin e saj. lidhje me rritjen e ofertave me 200 lekë secilën nga kompanitë celulare mesditën e djeshme.
Sipas saj, në Shqipëri, Autoriteti i Konkurrencës vetëm autoritet nuk ka.
“Ata e bëjnë se munden ta bëjnë. Sepse ne nuk kemi arritur asnjëherë të ndërtojmë shtet të vërtet.” – shkruan Nisma Thurrje.
Postimi i plotë:
Kompanitë celulare kanë rritur përsëri çmimet! Nga 200 lek e lart, për paketë. Dhe e bënë njëkohësisht. U morën vesh me njëri tjetrin dhe i rritën. Pa asnjë shkak apo motiv real. Nuk i rritën sepse po dilnin me humbje, përkundrazi ata kanë dalë me fitim gjithë këtë kohë.
Por përsëri vendosën t’i rrisnin, sepse nuk po fitonin aq sa të ndiheshin të ngopur.
Kur shohin që këtë popull e rrjep qeveria me tendera, e rrjepin miqtë e qeverisë me PPP-të, e rrjepin oligarkët me monopolet, përse mos ia vënë dhe ata pak shkelmin në fyt? Çfarë i pengon? Këtu Autoriteti i Konkurrencës vetëm autoritet nuk ka. Atëherë Kap ça t’kapësh.
Ata e bëjnë se munden ta bëjnë. Sepse ne nuk kemi arritur asnjëherë të ndërtojmë shtet të vërtet. Për 30 vjet kemi qënë shumë të zënë duke zgjedhur kush do të na rripte 4 vitet e ardhshme, nuk menduam si të ngrejmë ca institucione që të kujdesen, që të na mbrojnë.
Dhe nuk do të shpëtojmë asnjëherë nga makutëria, nëse nuk ndërtojmë shtet. Një shtet që funksionon pavarësisht kush ikën apo vjen në pushtet.
Dhe mos prisni ta bëjnë ata që janë vetë makutëria. Do duhet ta bëjmë ne, të gjithë…vetë!
