Një ditë para seancës së jashtëzakonshme plenare ku pritet të votohet ligji i vettingut, ambasadorët kanë vijuar takimet e tyre me krerët politikë. Ambasadori amerikan Donald Lu është takuar me kreun e Partisë Demokratike Lulzim Basha në selinë blu mesditën e sotme, ku ka qënduar rreth 1 orë. Ndërsa më pas ambasadori i SHBA-ve dhe ambasadorja e BE-së, Romana Vlahutin kanë takuar kreun e Kuvendit, Ilir Meta në Kryesi.
Takimi aty ka nisur rreth orës 16:00 dhe përfundoi rreth orës 16:35. Ky takim vjen një ditë para se Parlamenti të mblidhet për të votuar në një seancë të jashtëzakonshme ligjin për vetingun, të cilësuar si shumë të rëndësishëm nga ndërkombëtarët në kuadër të reformës në drejtësi.
Por miratimi i ligjit të shumë debatuar kaloi javën e shkuar vetëm me votat e maxhorancës, pasi opozita nuk pranoi ta votojë atë nën për nen.
Gjatë mbledhjes së fundit të Komisionit të Posaçëm të Reformës në Drejtësi, opozita kishte përgatitur një draft me rreth 40 amendamente për projektligjin e vetingut, por ato nuk u pranuan nga anëtarët e maxhorancës dhe i rrëzuan një nga një.
Ky fakt bëri që opozita të mos votojë projektligjin në tërësi, duke deklaruar se në nenet e tij shkelet Kushtetuta e vendit.
