“Personat e krimit të organizuar duhen zhveshur nga pasuria e paligjshme që ta kenë të pamundur të riciklojnë pasurinë e padeklaruar, që me makina sfiduese të vërtiten lart e poshtë, duke i bërë karshillëk shtetit, duke u hapur sediljesh.”
Pas kësaj deklarate të kryeministrit Rama në seancën plenare të sotme në Kuvend ka ardhur dhe një reagim nga Partia Demokratike.
Sekretari i Përgjithshëm i kësaj force politike përmes një postimi në rrjetet sociale shkruan se “AntiKÇK të nisë punën nga vila luksoze 2 milionë euro e Edi Ramës dhe nga shtëpitë e padeklaruara të Sandër Lleshajt!”
Reagimi i Bardhit:
Prej 6 vjetësh, Edi Rama është kryepolic, kryegjykatës dhe kryeprokuror dhe në vend që të luftojë krimin në çdo qelizë të shtetit, ka futur në burg mbi 30 mijë qytetarë që nuk paguajnë dot faturën e ujit dhe të energjisë elektrike.
Nëse Edi Rama do ta kishte lënë të lirë drejtësinë, Edi Rama do të kishte përfunduar pas hekurave të burgut si kryeministri që ka vjedhur me ministrat dhe me kriminelët e tij me qindra milionë euro para dhe pasuri publike!
AntiKÇK të nisë punën nga vila luksoze 2 milionë euro e Edi Ramës dhe nga shtëpitë e padeklaruara të Sandër Lleshajt!
