Të shtëna me armë zjarri janë shënuar pasditen e sotme në Shkodër. Nuk raportohet për persona të lënduar.
Sipas një rindërtimi paraprak të ngjarjes nga policia lokale, një person, në rrethana ende të paqarta, dyshohet se ka qëlluar më armë në ajër.
“Rreth orës 14:00, në vendin e quajtur Parrucë, në rrethana ende të paqarta, dyshohet se një shtetas ka qëlluar në ajër me armë zjarri dhe është larguar me automjet. Nga verifikimet e bëra nga policia nuk ka persona të dëmtuar. Shërbimet e Policisë kanë shkuar menjëherë në vendngjarje së bashku me grupin hetimor dhe vijon puna për sqarimin e rrethanave të ngjarjes, me qëllim identifikimin dhe kapjen e autorit”, thuhet në njoftimin paraprak të policisë lidhur me ngjarjen.
Brenda pak ditësh, në Shkodër shkrehen armët sërish. Mbrëmjen e 5 Shkurtit, një shkëmbim me armë zjarri u shënua në pedonalen e qytetit, ku një 35-vjeçare e cila kalonte në zonë, mbeti e lënduar. Katër persona u arrestuan lidhur me ngjarjen dhe më pas u lanë në burg nga gjykata. /BN/
