Pika e dhënies së kredive “Kredo Finance” në Durrës ka rënë pre e grabitjes këtë të shtunë.
Dyshimet e para janë se një person i maskuar ka marrë nga pika një sasi prej 1 mln lekë nga biznesi që ndodhet pranë stacionit të Trenit. Policia, e njoftuar nga një punonjës i sigurisë së biznesit, ka shkuar në vendngjarje dhe ka nisur hetimet. Autori, ndërkohë, është ende i paidentifikuar dhe i lirë.
“Në lagjen nr 12, në një rrugë dytësore, në filialin e një institucioni financiar, rreth orës 14:24, një person ende i paidentifikuar dyshohet nën kërcënimin e një sendi të ngjashëm me armë zjarri pistoletë ka marrë lekët mbi banak, një shumë rreth 100.000 (lekë të reja) dhe është larguar me vrap”, njoftoi policia.
“Shërbimet e Policisë së Durrësit me marrjen e njoftimit janë vënë në ndjekje të autorit ku është rrethuar zona në një perimetër të gjerë. Në kontroll të zonës është angazhuar edhe FNSH dhe forca e posaçme ‘Shqiponjat’, ku vijon kontrolli edhe me pika kontrolli në rrugica e rrugë kryesore. Grupi Hetimor ka shkuar në vendngjarje dhe po vijon punën për administronin e çdo prove që do shërbejnë në identifikimin dhe më pas kapjen e autorit”, thuhet më tej në njoftimin e policisë. /BN/
