Artan Shkëmbi, me funksion Drejtor i Drejtorisë Hetimore Qendror, në Departamentin për Policinë Kriminale pranë Drejtorisë së Përgjithshme të Policisë së Shtetit, ka dalë këtë të Premte para Komisionit të Jashtëm të Vlerësimit.
Në seancën dëgjimore, u konstatuan një sërë problemesh lidhur me pasurinë dhe figurën, për kandidatin për kreun e Byrosë Kombëtare të Hetimit.
Pasuria
Trupa e Komisioni i jashtëm i Vlerësimit, e përbërë nga Alban Laska, Artur Baku, Mirela Ujkani, ka arritur në përfundim se Shkëmbi ka bërë deklarim të pa saktë dhe se nuk justifikon pasuritë.
Shkëmbi ka deklaruar tre apartamente banimi, një me sipërfaqe 114m2, një me sipërfaqe 113 m2 dhe një tjetër në Ishëm i Durrësit. Si burim për përfitimin e tyre ka deklaruar të ardhurat nga emigrimi dhe të ardhura familjare.
Për KJV, Shkëmbi nuk justifikon një hua prej 40 mijë eurosh që ia ka dhënë kunatit.
Ndërsa për dy makinat, një “Chrysler” që e ka shitur 2.700 euro dhe një “Volksvagen Pasat” me vlerë 5 mijë euro që e ka në pronësi, nuk janë konstatuar parregullsi.
Pastërtia e figurës
KJV raportoi se s’ka denoncime, apo procedime ndaj tij, por ka të dhëna që ka qenë anëtar i Sigurimit të Shtetit, konkretisht oficer në strukturat e Sigurimit të Shtetit. Fakt ky që është raportuar më herët nga “BoldNews”.
Një tjetër problematike që konstatoi KJV është se Shkëmbi s’ka plotësuar deklarimin e formularit të figurës që tregon se subjekti ka, apo jo kontakte me persona të inkriminuar.
Niveli i arsimit përputhet me ushtrimin e detyrës dhe gradat e marra ndër vite.
/BoldNews/
