“KÇK, një turp institucional. Kap çfarë të kapësh është një term rruge. Si mund të ndërtohet institucionalisht? Është një term që ka qarkulluar me vite. Kjo e kthen termin e rrugës në vlerë të vërtetë”. Kështu e komentoi Grida Duma, nga studio e A2, nismën më të re të Qeverisë, të konkretizuar me Operacionin Forca e Ligjit. “A mund të lind një ligj me “të kapim çfarë të kapim”. Drejtësia ka vetëm një sens, sikur njëri vetëm të mbetet pa drejtësi, e gjitha është e padrejtë. Ne kemi legjitimuar një instrument i cili është vetë anti-shtet”, shtoi ajo.
Një prej personave të parë të cilëve u erdhi formulari i OFL, për të justifikuar pasuritë, ishte Lulzim Berisha. “Njeriut me lidhjet kriminale më të fuqishme në Durrës i thuhet ti mund të bësh punë komunitare. Tani pyetet sa pasuri ke. Kjo është tallje”, tha Duma. “Shqetësimi im është a mos po ndërtohet një ligj që të të mbrojë nga ligji? Kush e ka ndaluar shtetin të veprojë. Po hymë në vitin e tetë të qeverisjes, nuk ka asnjë ndëshkim. Në vitin 2013 kur erdhën në pushtet, e vetmja gjë që thoshin ishte “kështu na e lanë”. Kjo është më tepër se teatrale, është diabolike. Kjo ka rrezikun e madh të legjitimojë krimin. i thotë që do të të pyesim për pasuritë, pasi nuk të kemi bërë dot një gjyq. Gjyqet më të rëndësishme të organizatave kriminale mbetet përsëri varur”.
Bashkitë e mbetura pa kryetarë
Duma tha se të gjithë Kryebashkiakët që kanë lënë detyrën pasi janë akuzuar nga opozita, kanë pasur mbrojtjen e Kryeministrit. “Janë detyruar të largohen pas një serie denoncimesh që kanë ardhur nga PD, pasi kanë pasur mbrojtjen e Kryeministrit. Kjo nuk ka asnjë paqartësi, që ne jemi këtu duke bërë politikën e padrinove. E nëse del Padrino e thotë që ky është i pafajshëm, “mileti” duhet ta pranojnë ashtu siç është, gjykata nuk ekziston. Në këtë vend, nëse ke një njollë të një kredie të papaguar nuk guxon të shkosh në një bankë tjetër për të marrë kredi të dytë, e jo më të kandidoni në një post të lartë administrativ, pa pasur siguri”, u shpreh ajo.
Çfarë mund të bëjë PD më shumë?
Sa i përket aksionit opozitar, Duma tha se PD dhe aleatët nuk kanë lënë asgjë pa provuar deri tani. “Pavarësisht se jemi në një vend ku fajësojmë më shumë atë që nuk rregullon, se sa ai që prish. Shqipëria pret prej disa vitesh që t’i hapen negociatat. Po presim të gjithë që Reforma në Drejtësi të japë atë që është lavdia e vet për këtë vend. Unë besoj fort se me SHBA dhe BE është e vetmja rrugë, sepse vetë nuk e bëjmë dot”, u shpreh ajo.
Pjesëmarrjen në reformën zgjedhore e sheh si vendimin e drejtë, pasi ishte një prej kushteve kryesore nga Bundestagu gjerman. “Besoj që pas këtij momenti do të duhet të vendosim në këndin e detyrimit për të dhënë shembujt e parë të ndëshkimit”, u shpreh Duma.
