Kërcënimet ndaj familjarëve i ka kushtuar lirinë një 46-vjeçari nga një fshat i Beratit. Pas arrestimit mbrëmjen e 16 Janarit nga policia, 46-vjeçari i akuzuar për veprën penale “Dhuna në familje”, është lënë pas hekurave nga Gjykata e Beratit. Masë e dhënë 3 ditë pas arrestimit nga gjykata e rrethit, në përputhje me kërkesën e prokurorisë.
Sherri
Sipas hetimeve, rreth orës 20:00, 46-vjeçari teksa ka qenë në banesën e një të afërmi, pa shkak, ka filluar të shajë të dy prindërit dhe motrën e tij. Nga dëshmitë, i arrestuari më pas ka mare një sharrë për prerjen e druve dhe me të i ka kërcënuar se do ti vriste të tre personat e pranishëm në banesë. Po sipas dëshmive, i arrestuari edhe herë të tjera ka qenë i dhunshëm me ta dhe është person problematik dhe i dënuar më parë për dhunë në familje. Nga deklarimet e të afërme, kjo situatë është e përsëritur dhe ata kanë bërë kallëzim edhe më parë. Ai, gjatë konfliktit, i ka kanosur se do ti vrasi të gjithë familjarët e tij, kanë dëshmuar familjarët.
Në këto rrethana dhe pas njoftimit të marrë, ka shkuar në vendin e ngjarjes policia gjyqësore që ka gjetur të dyshuarin me sharrën në dorë. Efektivët kanë bërë shoqërimin e tij në polici dhe sekuestrimin e motor sharrës me cilësinë e provës materiale.
Dëshmia
Nga deklarimet e të dyshuarit, rezulton se ai ka deklaruar se do të vriste motrën dhe pastaj veten pasi ajo është problematike, sjell të dashurit në shtëpi dhe ai nuk e duron dot një gjë të tillë.
Sjellja e saj prej rrugaçeje, ka deklaruar i arrestuari, ka bërë që marrëdhëniet në familjen e tyre të jenë shumë problematike.
/BoldNews/
