Partia Demokratike ka hapur sot zyrtarisht fushatën elektorale në Dibër. Besnik Mustafaj ishte ndër folësit e takimit elektoral.
Ai tha se Dibra po ringjallte shpresën ashtu si 25 vite më parë. Mustafaj tha se “mashtrimi qeveritar, frika dhe korrupsioni kanë sjellë dëshpërim tek dibranët dhe të gjithë shqiptarët”.
Rama – tha Mustafaj – e do Shqipërinë të nënshtruar. Por ai shprehu bindjen se rinia nuk mund të pajtohet me mashtrimet e nuk mund të nënshtrohet.
“Në këto ditë shoh në fytyrat tuaja kthimin e shpresës si në 1990. U shpërndaftë kjo erë e mirë në të gjithë Shqipërinë. Në këtë lum njerëzor që ka vërshuar sot këtu shoh që shumica janë të rinj, janë lulja e rinisë dibrane. Këta djem dhe vajza janë burimi i mrekullueshëm i lindjes së shpresës. Ata nuk mund të pajtohen me dëshpërimin. Rinia nuk mund të pajtohet me dëshpërimin. Dëshpërimin e sjell korrupsioni, frika dhe mashtrimi qeveritar. Rinia nuk mund të pajtohet me këtë mashtrim. Përmes mashtrimit qeveria do ta zbrazë Shqipërinë nga Rinia dhe do të ketë një Shqipëri me pleq të nënshtruar”.
