Një ngjarje kriminale është parandaluar në kryeqytet. Një person ka hyri me pistoletë në një lokal në rrugën “Spiro Çipi”, duke kërcënuar se do të vriste me pistoletë qiradhënësen e lokalit. Por më pas ndërhyrja e uniformave blu vuri në prangta 43-vjeçari.
Personi i arrestuar është shtetasi A.U., 43 vjeç, lindur dhe banues në Tiranë, i dënuar më parë për veprat penale “Mashtrimi” dhe “Vjedhja e energjisë elektrike ose impulseve telefonike”.
Sipas policisë, “ky shtetas, për motive të dobëta, kanosi dhe kërcënoi për vrasje shtetasen P. R., qiradhënëse e lokalit ku u kap shtetasi i lartpërmendur”.
Grupi hetimor ka sekuestruar në cilësinë e provës materiale armën e zjarrit pistoletë, e cila është dërguar në laboratorin kriminalistik, për ekzaminime të mëtejshme.
Materialet i kalojnë Prokurorisë së Rrethit Gjyqësor Tiranë, për veprime të mëtejshme, për veprat penale “Kanosja” dhe “Armëmbajtja pa leje”, për të cilën parashikohet dënimi deri në 7 vjet burgim.
