Sektori për Krimet e Rënda në Drejtorinë Vendore të Policisë Tiranë, në bashkëpunim me Forcën e Posaçme Operacionale në Policinë e Shtetit, Forcat Speciale Renea dhe DVP Shkodër, kanë znarkuar në Shkdoër. Në qytetin verior janë kryer kontrolle me qëllim sigurimin e provave për zbardhjen dhe dokumentimin e plotë të ngjarjes mbi rrëmbimin e dhe vrasjen e Jan Prengës, të ndodhur në rrugën “London”, Kamzë më 17 Janar dhe kapjen e autorëve të tjerë të përfshirë në këtë ngjarje, konfirmuan burime zyrtare nga Policia e Shtetit.
“Në këtë kuadër, në qytetin e Shkodrës dhe rrethinat e saj, mëngjesin sotëm janë ushtruar kontrolle në banesa, biznese, magazina e objekte të braktisura. Si rezultat i kontrollit janë siguruar prova të vlefshme që shërbejnë për zbardhjen dhe dokumentin e plotë të ngjarjes”, shtuan të njëjtat burime.
Policia megjithatë, nuk ka arritur të arrestojnë ndonjë nga personat në kërkim për krimin, pavarësisht aksionit.
Arrestimet dhe sekuestrimet
Jan Prenga, 49-vjeç u rrëmbye më 17 Janar në rrugën “London”, Kamzë. Menjëherë pas ngjarjes nisën hetimet ku u përdorën nga policia e prokuroria dhe metoda proaktive. Në bazë të provave të grumbulluara nga grupi i posaçëm hetimor, Gjykata e Rrethit Gjyqësor Tiranë nxori urdhër për të ushtruar kontroll në disa subjekte private, hotele dhe tri banesa private në fshatin Pjezë, Shijak, Durrës, si dhe urdhra ndalimi për disa shtetas.
Në këtë kuadër u zhvillua operacioni policor “Resorti”, si rezultat i të cilit, më 28 Janar, u bë e mundur kapja dhe ndalimi i shtetasve:
- Leonard Hajri, 35 vjeç, banues në Shijak, i dënuar më parë;
- Olsi Turja, 36 vjeç, banues në Shijak;
- Elton Hajri, 32 vjeç, banues në Shijak;
- Bajram Hajri, 64 vjeç, banues në Shijak;
Gjithashtu, po në kuadër të operacionit, gjatë kontrolleve të kryera në disa subjekte private, hotele dhe tri banesa private në fshatin Pjezë, Shijak, Durrës, u gjetën dhe u sekuestruan 2 armë zjarri pistoleta, një sasi municioni, 16 aparate celular, 4 automjete dhe një shumë eurosh.
Një ditë pas këtij aksioni, policia arrestoi dhe Festim Bexhidi, 30 vjeç, banues në Kavajë”, duke e çuar në 5 numrin e personave të ndaluar lidhur me ngjarjen.
Dyshohet se 30-vjeçari, në bashkëpunim me 4 shtetasit e ndaluar më parë dhe me shtetas të tjerë, e kanë rrëmbyer për ta mbajtur peng, shtetasin Jan Prenga, më datë 17 Janar, në Kamzë. “Në cilësinë e provës materiale shtetasit Festim Bexhidi, i janë sekuestruar dy telefona dhe një sasi prej 850 eurosh”, njoftoi policia.
Gjykata Penale e Tiranës pritet të japë nesër masën e sigurisë për pesë personat e arrestuar.
Hetimet
Burime zyrtare nga Policia bënë me dije se, nga veprimet e thelluara hetimore, ka rezultuar se personat, pas rrëmbimit të shtetasit Jan Prenga, kanë shkuar direkt në resortin në pronësi të shtetasit Altin Hajri. Po nga veprimet hetimore, rezulton se personi i rrëmbyer, si pasojë e goditjeve të marra në Kamzë dhe humbjes së gjakut, ka ndërruar jetë gjatë rrugës për ta transportuar për në resort, aty ku do mbahej peng.
Gjithashtu, rezulton se autorët janë kujdesur për ta fshehur trupin e shtetasit Prengës, ndërkohë që forcat policore vijojnë kërkimet në zonën e Shijakut, për gjetjen e trupit.
Konfliktet
Dyshohet se rrëmbimi ka ardhur si pasojë e një konflikti që një nga vëllezërit e viktimës ka pasur me organizatoret dhe rrëmbyesit, si pasojë e disa konflikteve për çështje droge në Britaninë e Madhe.
Vëllai i viktimës, në gusht të vitit 2017, u dënua me 8 vite e gjysmë burg për trafik kokaine.
