Pas publikimit të reportazhit nga televizioni shtetëror italian RAI 3 ku tregonte se kultivimi i kanabisit në Shqipëri ka njohur rritje nga viti në vit, Partia Demokratike ka publikuar një video në rrjetet sociale.
Në video janë pamjet e materialit të televizionit italian ku thuhet se “Është rritur me 1200% ose 12 herë mbjellja e kanabisit” dhe kreu i qeverisë Edi Rama ku deklaron me zë dhe figurë se “Ne kemi vetëm një detyrë, të mos dëgjojmë askënd” apo “Aq shumë është rritur sasia e baltës nëpër media” dhe “Opozita do duhet çdo ditë të shpikë, të shpifë!”, deklarata këto në lidhje me denoncimet nga ana e opozitës apo materialet në media lidhur me kanabizimin e vendit.
“Edi Rama nuk dëgjonte kur opozita denonconte kanabizimin e vendit. Edi Rama nuk dëgjonte kur media shqiptare dhe ajo ndërkombëtare publikonin shifrat alarmante të mbjelljes së kanabisit . Edi Rama nuk dëgjonte as kur raportet e huaja e rendisnin Shqipërinë si prodhuese dhe eksportuese të kanabisit. Edi Rama ende nuk dëgjon alarmin e kanabizimit që vazhdon të bjerë! Edi Rama ka dështuar!” -shkrun PD në faqen e saj zyrtare në Facebook.
