Prej dy ditësh mali i Shëngjinit ndodhet nën pushtetin e zjarrit.
Dy vatra të reja zjarri që u shfaqën mëngjesin e sotëm kanë dalë jashtë kontrollit, duke iu afruar ndjeshëm edhe resorteve turistike në plazhin e Shëngjinit.
Flakët e zjarrit kanë shkaktuar panik te pushuesit, të cilët janë larguar menjëherë për shkak të tymit që mberriti deri në breg të detit. Era e fortë favorizoi përhapjen e shpejte të flakëve dhe ndryshimin e vazhdueshëm të drejtimit të tyre.
Pasi situata doli thuajse krejtësisht jashtë kontrollit, rreth ores 14 e 30 minuta, në zonë mbërriten helikopterët. Për të ndihmuar në shuarjen e flakëve në ndihme erdhen edhe helikopterë nga italia. Këtë e konfirmoi prefekti i Lezhës Eduart Ndreca, i cili foli për situatën në zonë.
Zjarrfikëset e bashkisë së Lezhës, portit të Shëngjinit dhe ato të ushtrisë u vendosën përgjatë rrugës drejt “Ranës se Hedhun” për të penguar flakët që të drejtohen drejt resorteve.
Të rrëzikuara vazhdojnë të mbetën disa banesa që ndodhen në mal. Ndryshimi i vazhdueshëm i drejtimit të erës e bën situatën të pasigurtë për përcaktimin e situatës në vazhdimësi. 100 ushtarë, dhjetëra forca policie dhe zjarrfikës tashmë janë në zonë që prej natës së mbremshme me shfaqjen e vatrave të zjarrit.
