Nga tërmeti shkatërrues i fuqisë 6,2 të shkallës së Rihterit që goditi pjesën qendrore të Italisë , numri i viktimave pritet të jetë akoma më i madh. Asnjë shtëpi nuk është e banueshme në Amatrice e zona të tjera. Ekipet e shpëtimit në terren janë në kërkim të të lënduarve.
Sizmologu shqiptar, Llambro Dumi deklaron se edhe vendi ynë rrezikon të goditet nga tërmete të madhësisë që goditi në orët e para të mëngjesit të sotëm Italinë Qendrore, duke shkaktuar dhjetëra të vdekur e qindra të lënduar.
Në një komunikim telefonik në “News24”, sizmologu Dumi theksoi se e vetmja masë parandaluese që mund të marrim për raste të tilla, është të ndërtojmë mirë.
“Jemi të rrezikuar nga tërmete të kësaj madhësie, në Shqipëri ka patur tërmete edhe 6.8 ballë. Duhet të përgatitemi, kam parasysh godinat tona. Duhet të ndërtojmë mirë. Shkenca sot nuk është ën gjendje ti paralajmërojë, aq më tepër ti parandalojë”- deklaroi Dumi.
Lidhur me tërmetin në Itali, sizmologu shqiptar tha: “Zona që u godit nga tërmeti në Itali është shumë pranë Aquilas- që u godit nga një tërmet i fortë në 2009-ën.
Është një zonë që fillon nga Reggio Emilia në veri, deri poshtë në Kalabri e njohur për tërmete. Në këtë zonë ka shumë ndërtime historike, monumente kulture. Pjesa me e madhe e rrënojave është nga ndërtime historike”.
