Të sfidosh portugezin Mourinho duket si një mision i pamundur, por Bastian Schweinsteiger duket se ja ka vënë qëllim vetes.
Një ditë pasi lidhi kurorë me tenisten serbe, Ana Ivanoviç dhe sapo kaloi pragun e 32 pranverave, gjermani e gjeti veten në listën e zezë: pra te futbollistët e padëshiruar nga trajneri i ri i Manchester United, Jose Mourinho.
Portugezi e ka nxjerrë nga lista e futbollistëve që do të mbajë për sezonin e ri dhe tanimë Schwein-i stërvitet me ekipin e të rinjve. Dhe kur Mourinho merr vendime të tilla, nuk toleron askënd dhe për këtë dinë diçka më shumë emra simbol të Real Madrid, si Raul dhe Casillas. Por Bastian ka vendosur të qëndrojë.
Sipas mediave gjermane, Schweinsteiger nuk ka ndërmend që të largohet, por do të marrë të plotë rrogën prej 10 milionë eurosh në sezon, deri në vitin 2018, qoftë edhe duke e ndjekur skuadrën e Manchester United, siç bëri këtë fundjavë, teksa postonte selfie duke parë shokët e skuadrës.
Gjatë këtyre ditëve kanë patur tratativa nga PSG e Juve, të cilat ai i ka refuzuar, ashtu sikundër edhe mundësinë e transferimit në një prej skuadrave të Milanos. E gjitha kjo ndodh plot një vit nga divorci që mesfushori bëri me Bayern, gjë që nuk u prit mirë nga tifozët bavarezë, që shfaqën në stadium një parullë: “skllevër të Guardiolës”.
12 muaj më pas Bastian Schweinsteiger nuk gjen hapësirë as në Manchester, po ai është një tip nuk ja prish festën askujt, por që nuk lejon njeri ti bëjë gati valixhet, pa luftuar më parë…
