Gjuajtje dhe gol, pastaj dhimbje dhe marrje mendsh! Kështu e përshkruan gazeta gjermane “Bild” debutimin e mesfushorit André Schürrle me Dortmundin në ndeshjen e fazës së parë të Kupës së Gjermanisë. Në fitoren e djeshme 3-0 ndaj skuadrës Eintracht Trier, ish-lojtari i Wolfsburgut vuajti për të fituar zemrat e tifozëve. Pjesa e parë shkoi shumë mirë për të dhe për Dortmundin, me japonezin Shinji Kagawa i cili bëri dopietë (8′, 33′) dhe me gjermanin i cili shënoi vetë golin e tretë (45′).
André Schürrle, në çastin kur doktorët po i qepnin plagën Pjesa e dytë ishte një tmerr për mesfushorin kampion bote. Në minutën 50′, Gonzalo Castro nis një kros drejt zonës. Portieri Chris Keilmann hidhet dhe godet njeriun 30-milionësh. Ylli i verdhezinjve bie përtokë. Doktorët e skuadrës ndërhyjnë menjëherë dhe Schürrle qëndron pa lëvizur, pasi e qepin katër herë në nofullë. Ai rikthehet në lojë, por me dhimbje, sepse pas pesë minutash merr një goditje tjetër. Kështu, ai detyrohet të lërë fushën, edhe me urdhër të trajnerit Thomas Tuchel.
“Ishte një çarje dhe u desh të më qepnin katër herë. Pata një marrje mendsh. Kjo ishte arsyeja pse lashë fushën”, – u shpreh Schürrle pas ndeshjes. “Kurrë nuk e kam provuar diçka të tillë. Kjo ishte ndeshja ime e parë zyrtare me Dortmundin dhe më ndodhi kështu. Me zor eca“, – shtoi ai. Tekniku Tuchel e kaloi episodin duke bërë shaka, si për të qetësuar lojtarin e tij. “I thashë se e shpëtuam nga një aksident i tretë. E nxorrëm nga rreziku duke e zëvendësuar”, – u shpreh strategu i verdhezinjve.
