Pak ka ndryshuar që nga viti 2015 për cilësinë e të jetuarit në Tiranë, sipas sondazhit më të fundit të kompanisë “Mercer”, e cila specializohet në konsulencën për burimet njerëzore dhe shtrihet në të gjithë botën.
Kështu, për sondazhin më të fundit të “Cilësisë së Jetesës” Shqipëria vazhdon të renditet ndër tre qytetet me cilësinë më të keqe në Evropë për të jetuar.
Trendin si një ndër qytetet evropiane me cilësinë më të keqe për të jetuar, Tirana ka disa vite që e ka ruajtur. Ndërkaq, renditja e kryeqytet shqiptar, në rang botëror, për sa i përket cilësisë së të jetuarit, përsëri lë shumë për të dëshiruar.
Për vitin 2016, Tirana është renditur në vendin e 179-të, në rang global për sa i përket cilësisë për të jetuar në këtë qytet. Tre qytete me cilësinë më të ulët të të jetuarit në Evropë sipas “Mercer” janë Kievi (rang botëror: 176), Tirana (rang botëror: 179) dhe Minsku (rang botëror: 180).
Nëse do të qëndrojmë në rang botëror, Vjena, kryeqyteti I Austrisë, vazhdon të renditet në vendin e parë për sa i përket cilësisë së të jetuarit, ndërsa në vendin e fundit është kryeqyteti i Irakut, Bagdadi (230).
Të dhënat që analizohen për të të nxjerrë një përllogaritje të cilësisë së të jetuarit në një qytetet janë: faktorë që: ndikojnë te shëndeti; strehimi; shkollat dhe arsimi; mallrat e konsumit; mjedisi ekonomik; shërbimet publike dhe transporti; mjedisi politik dhe social; mjedisi kulturor; mjedisi natyror; argëtimi.
Të gjithë këta faktorë që përdoren nga kompania “Mercer” janë një temë më vetë për t’u analizuar nga çdo kryebashkiak i një qyteti për të ndërtuar një strategji për të përmirësuar cilësinë e të jetuarit në qytetin që drejton. Edhe pse në epokën e sotme ekzistenca e një figure politike lidhet shumë me angazhimin në rrjetet sociale, ajo nuk vlen nëse nuk përkthehet në vepra konkrete dhe të prekshme nga qytetarët.
