Trupi i pajetë i djalit 12 vjeç, Andrea Zariu u përcoll ditën e djeshme për në banesën e fundit.
Nëna e tij, Brunilda e shokuar, në gjendje të tronditjes së thellë dhe duke mos pranuar dot fundin makabër të djalit të saj të cilit ju pre koka nga Jorgos Zani në Palasë, ka tentuar vetëvrasjen. Familja Zariu në lagjen “1 Maji” në qytetin e Fierit e pikëlluar nga kjo masakër e kushëririt me probleme mendore ende nuk i ka treguar nënës së djalit se si ka vdekur i biri.
Në vilën 4-katëshe të familjes Zariu në Fier është bërë si “shtetrrethim”. Askush nuk të lë të depërtosh brenda saj, sidomos nëse je pjesë e medias. Personi i vetëm që arrin të flasë është një kushërirë e largët e familjes. “Nuk është e mundur të futesh brenda. Gjendja është shumë e rëndë. E ëma e djalit nuk di gjë se si i ka ikur i biri nga kjo jetë. Ajo e di që dikush e ka qëlluar me gur në kokë dhe ai ka vdekur.
Nuk e ka marrë vesh të vërtetën e shkreta ajo”, shprehet kushërira për “Panorama”. Për këtë arsye, të afërm të familjes Zariu mundohen që të mbajnë larg çdo person, prej të cilit nëna Brunilda mund të mësojë të vërtetën e dhimbshme. Kushërira tregon se e ëma e viktimës është në gjendje shumë të rëndë psikologjike.
Prej saj mësohet se në dy raste ajo është penguar në çastin e fundit për të mos realizuar tentativën për të vrarë veten, duke u hedhur nga ballkonet e shtëpisë. Ceremonia mortore e përcjelljes së viktimës Andrea Zariu në banesën e fundit u bë në orën 12:30.
Në ceremoni ishin të pranishëm shumë banorë të fshatit Palasë, aty ku iu mor jeta 12- vjeçarit Andrea. Viktima ishte djali i vogël i familjes së Platon Zariut. Ndërsa djali i madh është 18 vjeç. Në vilën 4-katëshe nga u përcoll dje 12-vjeçari jetonin deri dy ditë më parë gjyshërit e tij, pasi familja Zariu banonte në Greqi.
Ata kishin ardhur për pushimet e verës, ku kishin qëndruar në fshatin e nënës së Andreas, në Palasë, afër detit. Pikërisht në këtë fshat kishte dashur të qëndronte edhe disa ditë të tjera fëmija i vogël, te gjyshërit nga e ëma, pa e menduar as ai vetë, por as familjarët e tij për të keqen që do t’u pllakoste. Megjithëse autorin e njihnin si person me probleme, në asnjë moment nuk ua merrte dot mendja se pikërisht ai do të bëhej tmerri i familjes së tyre.
