Në jetë nuk ka të pagabueshëm, në futboll … mbase po!
I vetmi i cili thyen çdo ligj është mesfushori gjerman Toni Kroos. Natyrisht, kjo është paksa e tepruar, sepse e përkryera thjesht nuk ekziston, por çdokush ia lejon vetes të ngrejë në piedestal lojtarin më konstant të Real Madridit, njeriun i cili rekordet në pasime i ka si bukën e përditshme.
Kështu, “show” i radhës i kampionit të botës u regjistrua në ndeshjen e së martës mbrëma me Reimsin për trofeun “Bernabeu“, ku madrilenët fituan 5-3 falë edhe klasit të jashtëzakonshëm të ish-lojtarit të Bayernit me pozicionimin dhe lojën e tij gjeniale. Sergio Ramos dhe Nacho shënuan me kokë pas kroseve në goditje këndi të mjeshtrit Kroos, i cili është rikthyer vonë në “Santiago Bernabeu” pas pushimeve “post-Euro 2016”. Efekti i Kroosit në lojën e “galaktikëve” ka qenë gjithnjë i dukshëm.
Në dy sezonet e tij me Real Madridin, 31 nga 70 golat e shënuar nga skuadra pas goditjeve të dënimit janë nisur nga këmbët e gjermanit, që i bie të jenë 45%. Kjo statistikë do të ishte shumë herë më e lartë, nëse goditjet e dënimit pranë zonës së rreptësisë nuk do të gjuheshin nga yjet Cristiano Ronaldo dhe Gareth Bale. Teksa Kroos ka qenë kaq shumë dominant në asiste, kontributi i kroatit Luka Modric në këtë aspekt ka rënë në 8.5% në dy sezonet kur ata kanë luajtur së bashku. Real Madridi ka pasur gjithsej 125 asiste në sezonin 2014-2015 dhe 108 në sezonin 2015-2016, në të cilat Kroos ka dhënë përkatësisht 10.4% dhe 10.18%.
Toni Kroos i ka kushtuar “vetëm” 25 milionë euro Real Madridit Sikur të mos mjaftonin dhuratat e tij për shokët e skuadrës, Kroos ka shënuar tetë gola me aksione të rrjedhshme me fanellën e Real Madridit. Ai është i treti në listën e lojtarëve me më shumë asiste të dhëna në tetë vitet e fundit në skuadrën madrilene. Përfundimisht, ai është një nga blerjet më të mira – ndonëse pa bujë të madhe – të presidentit Florentino Perez.
